MEMORIA: XEOGRAFÍAS SONORAS 20-21

 Todos os cursos desde 2006 a Consellería de Cultura, Educación e Universidade (Asesoría de Bibliotecas Escolares) publica o lema e o cartel para as bibliotecas escolares de Galicia. O lema elixido para o curso 2020/21 foi “XEOGRAFÍAS LECTORAS NA BIBLIOTECA ESCOLAR[1] e a encargada nesta ocasión de interpretar e materializar esa idea foi Bea Lama [2].

Foto 1. “Xeografías lectoras” por Bea Lama.

 Este curso en especial, se nos convida a explorar todas as posibilidades que nos ofrece a lectura para construír á persoa lectora. No noso caso extrapolámolo á escoita de música porque ao igual que a lectura, tamén é unha sorte de viaxe; como din Consuelo Gundín e María José Pousa “(...) obedecen á mesma pulsión: o desexo ou a necesidade de abrir unha paréntese na vida cotiá, romper coa rutina, coñecer outros lugares, vivir novas experiencias, ser outros.” [3]

 Así pois, o equipo de biblioteca propuxo desde o blog escoitas semanais desde diferentes perspectivas cun mapa do mundo como punto de partida das viaxes.  

Foto 2. Mapa de Xeografías Sonoras. Para seguir a viaxe, clica aquí 

 Durante dous trimestres compartimos unha viaxe onde:

-          Escoitamos músicas que nos fixeron viaxar lonxe no espazo como por exemplo ao Xapón ou á India; lonxe no tempo como cando fomos á orixe cas frautas prehistóricas ou incluso tan lonxe como á cálida Persia das Mil e unha noites.

-          Atisbamos manifestacións doutras culturas nas que a música ten o seu propio espazo e funcionalidade como nos wagogo ou nos aborixes australianos. Quizais preguntámonos por elas e incluso cuestionámonos cousas como a súa situación social actual.

-          Lembramos a nosa propia cultura que forma parte de nós e lévanos ao fogar.

-          Puidemos  descansar ou parar se estabamos cansos, acelerar se tiñamos ganas ou mesmo cambiar de ruta.

-          Puidemos descubrir cousas novas (instrumentos, sonoridades, técnicas musicais...) que nos gustaron... ou quizás non.

-          Quizais picounos a curiosidade e ampliamos algunhas das rutas.

-          Quizais puidemos en parte entender por que o mundo é como é e que está en constante transformación.

-          Escoitamos música porque simplemente gústanos saborear os sons.

 Na Asesoría de Bibliotecas fan un símil fermoso entre o regreso dunha viaxe con pechar un libro ou rematar unha escoita: supón a volta á vida de cadaquén, pero cunha maior bagaxe: coñecementos, palabras, imaxes, sons, inquedanzas, emocións... son os souvenirs lixeiros que se foron engadindo á equipaxe de saída.” [3]

 Lembra que podemos organizar ese o noso espazo sonoro ao que viaxamos ao longo de toda a nosa vida, a nosa propia banda sonora que forma parte de nós e á vez fainos ser nós. Son as “constelacións” das que fala María Victoria Moreno arredor dos seus libros [4]: podemos escoitar as nosas músicas e situalas no noso ceo particular, algunhas estarán illadas quizais e outras formarán constelacións -grandes ou pequenas- porque estarán relacionadas por algo (unha época ou lugar de escoita? Un mesmo autor? Curiosidades? Temática? Escoitámolas sós ou con alguén? Compartímolas? Alguén ensinounas? Fannos sentir algo?...).

 Imos rematar co escritor xaponés Murakami, cun anaco da súa obra “Kafka na orilla” que nos lembra eses souvenirs lixeiros mais poderosos que nos traemos da viaxe:

“- Non é que saiba moito [de música], pero gústame e cando estou só, adoito  escoitar música a miúdo.

- Entón, gustaríame preguntarche unha cousa. Pensas que a música ten o poder de cambiar a xente? É dicir, que se, nun determinado momento, escoitar unha música determinada, esta pode facer que se produzan grandes cambios dentro de ti.

- Oshima asentiu. - Por suposto, dixo. Isto sucede. Experimentamos algo e, como resultado, algo ocorre. É unha especie de reacción química. Logo examinámonos a nós mesmos e descubrimos que a gradación de todo o que nos rodea ascendeu un punto. E que, ao noso redor, o mundo expándese. Eu experimenteino. Non ocorre a miúdo, mais ás veces ocorre. É como o amor".

 Se escoitas música o mundo expándese... 

                                                                                                   Equipo de biblioteca 2020-21

 

[1] Xeografías lectoras na biblioteca escolar. | Bibliotecas escolares (xunta.gal)

[2] Así o fixo... Bea Lema | Bibliotecas escolares (xunta.es)

[3] Xeografías lectoras na biblioteca escolar | Eduga (xunta.gal)

[4] María Victoria Moreno: "constelación literaria" arredor dalgúns dos seus libros | Bibliotecas escolares (xunta.gal)

Comentarios

Publicacións populares deste blog

XEOGRAFÍAS SONORAS: FIN DA NOSA VIAXE.

RETO: A CASA DE JOSÉ FONTENLA LEAL