Contos que curan
Dende a Biblioteca José Fontenla Leal, fixemos unha pequena selección para que poidades desfrutar dunhas emotivas lecturas. Estes libros non se poden levar para a casa así que soamente os podedes ler na biblioteca. Coidade o material.
Moitas grazas por este proxecto á biblioteca de O Porriño e tamén moitas grazas á Biblioteca Municipal de Narón, en especial a Ainhoa e a Fátima, pola axuda e xestión deste préstamo.
Esperemos que vos gusten.
-----------------------------------------------------------------------------------------------------------------------------
O aumento dos problemas e trastornos mentais representa un desafío para o futuro da humanidade, e actuar na idade infantil resulta clave para atallalo. Todos os axentes sociais poden traballar neste obxectivo desde o seu campo de acción, facendo posible unha vida máis alentadora para os nosos nenos e nenas.
No que respecta ao ámbito das bibliotecas, estas teñen a oportunidade de colaborar coa biblioterapia: unha disciplina que usa os libros con finalidade terapéutica, e que nos últimos tempos está amosando o inmenso valor que a lectura pode ter no campo da saúde mental.
A biblioteca do Porriño, comprometida na construción social da súa comunidade, presenta este proxecto de biblioterapia infantil, “Contos que curan”: unha serie de boletíns temáticos que teñen como obxectivo axudar a previr, identificar e xestionar distintos problemas e trastornos infantís en nenos e nenas entre os 3 e 12 anos de idade.
Cada boletín ofrecerá un repertorio de contos de ficción seleccionados, clasificados e recomendados. Mencionar que se tenta incluír a maior cantidade posible de libros en idioma galego, e se procurará reunilos fisicamente na biblioteca, sempre que sexa posible. Así pretendemos axudar a que familias, educadores e profesionais da saúde da nosa comunidade poidan realizar unha mediación terapéutica máis eficaz.
Porén, esta colección non pretende desenvolver un tratamento terapéutico por si mesma, nin substituír a necesaria intervención de profesionais sanitarios, e non debería ser usada como substituto desa atención. Trátase dun proxecto realizado desde o ámbito bibliotecario por profesionais do libro e da lectura, acostumados a buscar, seleccionar, clasificar e difundir información bibliográfica de calidade. Esas son as súas fronteiras, e recomendamos acudir aos profesionais sanitarios, de ser o caso, para obter unha avaliación pertinente e un tratamento axeitado a cada situación individual.
A morte representa a experiencia máis incomprensible para o ser humano. E a pesar de ser un feito tan natural coma a propia vida, adoitamos rodeala de medos e interrogantes, dor e frustración, emocións e sentimentos negativos que acaban por superarnos. E quizáis por iso acabamos converténdoa nun tabú.
Aos nenos e nenas cústalles máis. Moito máis, porque non están aínda preparados para comprender que é algo universal, inevitable, irreversible e permanente. Ademais, os adultos tentamos evitarlles o sufrimento caendo moitas veces na sobreprotección, nas mentiras piadosas, ocultando as emocións, promovendo os silencios: a pesar das boas intencións, non estamos a facerlles ben ningún. E poderiamos aproveitar estas experiencias para que aprendan a xestionar as próximas situacións de perda que necesariamente van ter que afrontar no futuro.
Como facelo? É difícil, pero unha opción sería acompañar na dor, falar con sinceridade, dialogar sobre os sentimentos, explicar as diferentes etapas do loito, responder as dúbidas e favorecer a comunicación mutua para que así poidan crecer emocionalmente fortes. Lerlles contos axeitados tamén pode facilitar as cousas… Porque os contos non curan por si mesmos, pero poden axudarnos a axudarlles.
Para iso propoñemos unha selección de lecturas. Historias que abordan a morte e o loito desde distintos puntos de vista e para distintos grupos de idade. Aínda que están clasificados por categorías para afinar a busca e facilitar a escolla (morte en xeral, morte de avós, pais/nais, amigos e mascotas), non se trata dunha división ríxida: o universo da infancia é o suficientemente complexo e imaxinativo para etiquetalo tanto. Por iso animamos a bucear con mente aberta entre as distintas propostas de lectura que formulamos neste Boletín #1 de “Contos que curan”.
Esperamos que resulten útiles.
Comentarios
Publicar un comentario